endlich is wieder so weit: Da Vorhang geht auf, d’Bühn erwacht zum Leben und bei uns werd wieder gspuit, glacht und wahrscheinlich aa a bisserl improvisiert. Und heuer is uns’re Theatersaison sogar a ganz besondere: Zum letzten Mal spuin ma in da Rohrmoser-Halle!
In de letzten Jahr war d’ Rohrmoser-Halle für uns a wunderbare Heimat auf Zeit und hats uns möglich gmacht, dass ma weiterhin für eich Theater spuin kenna. Dass ma uns bei da Familie Rohrmoser so guad aufghobn gfühlt ham und ihre Halle all de Jahr nutzen ham derfa, is alles andere als selbstverständlich. Dafür samma von Herzen dankbar!
Aber koa Angst – des Theater geht natürlich weiter: Ab da nächsten Saison derf ma dann im neu erbauten Bürgerhaus uns’re neue Bühne beziehn. Bevor’s aber so weit is, lass ma’s in da Rohrmooser Halle no amoi richtig kracha! Und dafür hamma heuer des Stück
„Tante Emma Dilemma“
Und wia da Titel scho vermuten lasst: Ganz ohne Durcheinand, Verwechslungen und allerhand verzwickte Situationen geht’s natürlich ned. Da bleibt garantiert koa Aug trocken und koa Lachmuskel verschont!
Mitten drin im ganzen Schlamassel steckt natürlich uns’re Schauspielertrupp’n. Mit vui Spielfreid, Herzbluat und der richtigen Portion Wahnsinn san’s scho fleißig am Proben, damit’s auf da Bühn wieder ordentlich rundgeht.
Die Aufführungstermine san aa scho g’setzt – und am letzten Tag im Oktober startet da Kartenvorverkauf. Also bleibts gspannt, merkt’s eich den Termin vor und sicherts eich rechtzeitig euer Platzl, wenn’s losgeht!
Und weil Theater mit am guadn Schmankerl glei no vui scheena is …
… is natürlich aa fürs leibliche Wohl bestens gsorgt! Vor und nach da Vorstellung und selbstverständlich aa in de Pausen zwischn de Akte könnt’s eich stärken und aufwärma. Es gibt frische Bratwürstl vom Grill und für alle, die’s liaba fleischlos meng, a würzigs Chili sin Carne. Dazu an guadn Glühwein für warme Händ und warme Herzen und für alle Süßmäuler natürlich Lebkuchn.
So wird aus’m Theaterabend a richtig g’mütliche Sach – mit Lacha, Ratschn, Weihnachtsduft und allem, wos bei uns einfach dazua ghört!
Mir gfrein uns auf jeden Fall narrisch drauf, wenn’s wieder hoaßt: Vorhang auf bei da Dorfbühne Laimering!
